Tovuzda "Konstitusiya və Suverenlik İli" çərçivəsində Ümummilli Lider Heydər Əliyevin anadan olmasının 102-ci ildönümü münasibətilə uşaq və yeniyetmələr arasında Şahmat üzrə Tempo turniri təşkil olunub.
Turnir Tovuz Rayon İcra Hakimiyyəti, Yeni Azərbaycan Partiyası Tovuz rayon təşkilatı, Qazax-Tovuz Regional Təhsil İdarəsinin Tovuz rayon Təhsil Sektoru və Uşaq-Gənclər İdman-Şahmat Məktəbinin birgə təşkilatçılığı ilə baş tutub. Yarış məktəbin inzibati binasının önündə, açıq havada keçirilib.
Tədbirin açılış mərasimində YAP Tovuz rayon təşkilatının sədri Nihad Pənahov, Tovuz rayon İcra Hakimiyyəti aparatının məsul əməkdaşı Tofiq Əliyev və Uşaq-Gənclər İdman-Şahmat Məktəbinin direktoru Məleykə Əmirzadə iştirak ediblər.
Əvvəlcə Ümummilli Lider Heydər Əliyevin və Vətən uğrunda canını fəda etmiş şəhidlərin əziz xatirəsi bir dəqiqəlik sükutla yad edilib.
Çıxış edən YAP Tovuz rayon təşkilatının sədri Nihad Pənahov iştirakçıları salamlayaraq, ümummilli lider Heydər Əliyevin müasir müstəqil Azərbaycanın qurulması və inkişafında müstəsna xidmətlərini vurğulayıb. O, bu gün əldə olunan uğurların məhz Ulu Öndərin siyasi kursunun nəticəsi olduğunu qeyd edib.
Uşaq-Gənclər İdman-Şahmat Məktəbinin direktoru Məleykə Əmirzadə isə çıxışında tədbirin məqsəd və əhəmiyyətindən danışaraq, Heydər Əliyevin respublikaya rəhbərlik etdiyi dövrdə şahmatın inkişafına xüsusi diqqət göstərdiyini bildirib. O, ölkədə şahmat məktəblərinin açılması, istedadlı gənclərin üzə çıxarılması və onların beynəlxalq arenada uğurla təmsil olunmasında Ulu Öndərin böyük rolunu vurğulayıb və iştirakçılara uğurlar arzulayıb.
Turnirin sonunda qalib və fərqlənən iştirakçılar təşkilatçılar tərəfindən diplom və qiymətli hədiyyələrlə təltif olunublar.
