Azərbaycan Silahlı Qüvvələrinin yaradılmasının 106 illiyi münasibətilə Şahbuz rayon ərazisində “N” saylı hərbi hissədə tədbir keçirilib. Tədbirdə şəxsi heyət və qonaqlar ümummilli lider Heydər Əliyevin və Azərbaycanın suverenliyi, ərazi bütövlüyü uğrunda canlarından keçmiş şəhidlərin əziz xatirəsini bir dəqiqəlik sükutla yad edib, sonra Azərbaycan Respublikasının Dövlət Himni səsləndirilib.
Azərbaycan Respublikasının müdafiə naziri general-polkovnik Zakir Həsənovun və müdafiə nazirinin müavini - Əlahiddə Ümumqoşun Ordu komandanı, general-polkovnik Kərəm Mustafayevin təbrikləri şəxsi heyətə çatdırılıb.
Tədbiri giriş sözü ilə açan hərbi hissənin komandiri Vətənimizin müdafiəçilərini Silahlı Qüvvələr Günü münasibətilə təbrik edərək, Azərbaycan Silahlı Qüvvələrinin yaranma tarixi, son illərdə ordu quruculuğu sahəsində əldə olunmuş uğurlardan danışaraq bildirib ki bu gün güclü Azərbaycan Ordusu istənilən döyüş tapşırığını, hücum əməliyyatını yerinə yetirməyə qadirdir, şəxsi heyətin döyüş ruhu yüksəkdir.
Hərbi hissə komandiri çıxışında bildirib ki, xalqımız 26 yun Azərbaycan Respublikası Silahlı Qüvvələri Gününü Müzəffər Ali Baş Komandanımızın rəhbərliyi ilə Azərbaycan Ordusunun yaratdığı yeni reallıqlar şəraitində qarşılayır. Böyük tarixi şəxsiyyət Heydər Əliyevin Azərbaycana rəhbərliyi dövründə Azərbaycan Ordusu nizami ordu kimi formalaşmağa başladı. Azərbaycan Respublikasının Prezidenti cənab İlham Əliyev ordu quruculuğunu dinamik inkişaf etdirdi. İndi Azərbaycan Ordusu dünyanın ən güclü orduları sırasındadır. Dahi Rəhbərin mütərəqqi siyasətinin layiqli davamçısı, ölkə Prezidenti cənab İlham Əliyevin apardığı məqsədyönlü və uğurlu siyasət, həyata keçirdiyi davamlı və hərtərəfli islahatlar nəticəsində Azərbaycanda regionun ən güclü peşəkar ordusunun formalaşdığını vurğulayan hərbi hissə komandiri qeyd edib ki, Müzəffər Ali Baş Komandanın müdrik rəhbərliyi altında şanlı Ordumuzun cəmi 44 gün ərzində torpaqlarımızı işğaldan azad etməsi, həmçinin 23 saat davam edən lokal xarakterli antiterror tədbirləri nəticəsində dövlət suverenliyimizin bərpa olunması məhz bu müdrik siyasətin parlaq təzahürüdür. Dörd ildir ki, xalqımız Silahlı Qüvvələr Gününü artıq müzəffər ordu, qalib xalq kimi qeyd edir. Beynəlxalq ictimaiyyət də Azərbaycan Ordusunun dünyanın ən güclüləri sırasında olduğunu etiraf edir. Ordumuz qürurumuzdur. Ordumuzun döyüş qabiliyyəti, vətənpərvərlik ruhu yüksək səviyyədədir.
Tədbir hərbi hissənin xidmətdə fərqlənən hərbi qulluqçularının təltif olunması ilə davam etdi. Bayram tədbiri konsert proqramı ilə yekunlaşdı.
Şübhə etməyə dəyməz ki, bunca qayğı və diqqətin, yüksək səviyyəli təlimin qarşılığında Əlahiddə Ümumqoşun Ordusunun hərbi qulluqçuları içdikləri hərbi anda sadiq qalaraq öz üzərlərinə düşən vəzifəni şərəflə yerinə yetirəcək, torpaqlarımızı etibarlı qoruyacaq, düşmən üzərində qazandığımız Böyük Qələbənin nəticələrinin qorunub saxlanılmasına sanballı töhfələr verəcəklər.
